Fiskiveiðieftirlitið varð sett á stovn í 1976. Heitið á stovninum var tá Vaktar- og Bjargingartænastan. Navnið varð seinni broytt til Fiskiveiðieftirlitið.

Fiskiveiðieftirlitið er deild undir Fiskimálaráðnum, og hevur skrivstovu í Tórshavn.

Sambært løgtingslóg nr. 28 frá 10. mars 1994 um vinnuligan fiskiskap, fyrisitur Fiskiveiðieftirlitið, eftirlit á sjógvi og landi.

Fiskiveiðieftirlit á sjónum verður útint av skipum hjá Fiskiveiðieftirlitinum og donsku sjóverjuni.

Umframt at útinna eftirlit í føroyskum sjógvi, luttaka føroysku eftirlitsskipini eisini í altjóða sjógvi. Her er serliga talan um NAFO- og NEAFC skipanarøkini.

Av øðrum uppgávum kunnu nevnast :

• Eftirlit og skráseting av fiskidøgum.
• Eftirlit og skráseting av kvotum og hjáveiðikvotum. 
• Eftirlit og skráseting av kvotum á fjarleiðum.
• Eygleiðaraskipan.
• Fylgisveinaeftirlit við skipum.
• Góðkenning av innvigingarskipanum.
• Eftirlit við upp- og umskiping av frystum fiski (Port State Control).
• Eftirlit við avreiðingum hjá føroyskum skipum í útlendskum havnum.

Álagt er Fiskiveiðieftirlitinum, at samstarva við eftirlitsmyndugleikar í øðrum londum.

Álagt er eisini Fiskiveiðieftirlitinum, at luttaka í leiting og bjarging á sjónum, í samstarvi við MRCC Tórshavn.

Fiskiveiðieftirlitið hevur eisini sáttmála við Tryggingarfelagið Føroyar um samstarv. Uppgávur í hesum sambandi, snúgva seg mest um sleip og kavarahjálp.

Fiskiveiðieftirlitið og Skipaeftirlitið samstarva eisini, tá ið talan er um maninningarviðurskifti á føroyskum skipum. Fiskiveiðieftirlitið ger kanningar av manningarskjølum, meðan skip eru til fiskiskap, og hevur heimild, at geva skipum boð, at fylgja við til lands, um brot verða staðfest á manningar- og mynstringarreglur.

Skip frá Fiskiveiðieftirlitinum, luttaka eisini í átøkum, ið standast av oljudálkingum. Deildin hevur nakað av útgerð til oljuupptøku á sjónum. Harafturat eru fólk, ið eru køn at nýta útgerðina, í starvi á Fiskiveiðieftirlitinum.